Selamat Taun Baru China

Ngagai semua menyadi kitai ti nyambut Taun Baru China, aku ingin meri Selamat Baru China.

Arap ka taun baru tu mai pemaik, pengelantang, pengerai enggau pengeraja ngagai semua kiti

Q O N G X I F A C A I

Selamat Taun Baru 2009

Enti nitih ka ati, aku agi deka nampung kenang pasal menua sitak Selangau. Tang meh laban taun nyau deka beganti nyaalai aku lengka ka dulu kenang nya.

Diatu aku ngenang mimit pasal taun ti deka datai.Terubah tu aku meri Selamat Nyambut Taun Baru 2009 dikena kitai ngelengka ka taun ti lama. Taja agi lembau kaki nyingkang ngagai taun ti deka datai laban kitai nemu umur kitai betambah tuai.Tang baka pasang surut enggau mansang maya awak ia datai nadai ulih ditagang.

Sekeda utai ke nyadi dalam taun 2008 mayuh udah ngasuh kitai tegenong baka puyu mabuk keruh, baka empelekung mabuk ambuh. Siti ari utai ke nyadi ti udah ngasuh mensia di menua Malaysia asai ke enda pechaya, ianya, pemutus bepilih besai ti kedua-belas kena 8 Mac tu kemari. Taja Barisan Nasional agi mujur numbuh ka perintah ba peringkat federal, BN alah ba bepilih Dewan Undangan Negeri (DUN) di Lima buah nengeri, ianya di Pulau Pinang, Kedah, Perak, Selangor enggau di Kelantan. Ba peringkat fedeal BN enda te-ulih ka dua-pertiga ari penyampau kaban parliamen.Dua perkara ti enda kala nyadi ngelamatu, ianya, BN enda te-uilh ka dua-pertiga kerusi parliamen sereta alah ba Lima buah nengeri, amat meri reti ti besai ba ati tiap rayat Malaysia.

Di menua Amerika Syarikat, kenyau ari menua nya merdeka dalam taun 1776, taun 2008 tu meh keterubah ia urang kulit chelum dipilih nyadi Presiden ngisi rumah putih pengelama empat taun ti deka datai tu ila.Mayuh meh pekara bukai ti udah nyadi dalam taun 2008. Nyaalai sebedau kitai ngelengka ka taun 2008 dalam LIMA MINIT agi lalu nyambut taun 2009 aku besampi ka semua kitai bela gerai nyamai, lantang senang dalam semua pengawa. Arap ka kitai nyambut taun 2009 tu dalam pemaik, pengelikun enggau pengaga ati.

Selamat Taun Baru 2009.

Oh...Selangau Menua Aku

Parliamen P.214 Selangau ke diatu bisi mungkur dua iti sitak kunsil nengeri, ianya N.52 Tamin enggau N.53 Kakus. Kaban Parliamen Selangau ke diatu ianya YB Datuk Joseph Entulu Anak Belaun. Udah menang bepilih parliamen dalam taun 2004 tu kemari, YB Datuk Joseph Entulu lalu dichiri nyadi Sapit Menteri dalam opis Menteri Besai. Diatu iya nyadi Sapit Menteri Pemansang Menua Pesisir. Sebedau mangku pengawa nyadi kaban parliamen Selangau, YB Datuk Joseph Entulu udah nyadi kaban kunsil nengeri sitak N.52 Tamin ari taun 1991-2006.Sebedau YB Joseph Entulu nyadi kaban parliamen Selangau dalam taun 2004, kaban parliamen ti dulu ianya YB Jospeh Mauh Anak Ikeh ari taun 1990-2004. Diatu YB Joseph Mauh Ikeh nyadi kaban kunsil nengeri sitak N.52 Tamin udah iya ti menang dalam taun 2006 tu kemari. Sitak kunsil nengeri N.53 Kakus diari ka YB John Sikie Anak Tayai kenyau ari taun 1991 datai ka diatu.

Bala pemacha, tu meh kenang ngelansa pasal sitak Parliamen P.214 Selangau dikena aku muka tirai randau kitai ngenang menua Selangau. Udah tu ila baru kitai ngenang enggau silik ni penyauh menua Selangau tu udah mansang tauka ni penyauh enti agi tinggal. Diatu aku ngelengka ka kenang kitai nangka tu dulu.